Inirerekomenda ng WHO, US CDC, at mga Kagawaran ng Kalusugan sa iba’t ibang panig ng mundo na magsuot ang mga tao ng mga mask o takip sa mukha kapag nasa mga pampublikong lugar. Nagbibigay ng proteksyon sa mga tao ang mga mask at iba pang personal protective equipment (PPE) na tulad ng mga guwantes, gown, at face shield para hindi sila direktang madikitan ng virus na nagdudulot ng COVID-19. Kadalasang kumakalat ang virus sa pamamagitan ng ilong at bibig. Mapapaliit ang posibilidad ng pagpapasahan ng mga tao ng virus sa pamamagitan ng pag-ubo, pagbahing, o mga talsik kapag nagsasalita nang malakas kapag tinakpan ang ilong at bibig.

Gayunpaman, hindi ito sapat para mapigilan ang pagkakahawahan. Sobrang liit ng virus at puwede pa rin itong makalusot sa pisikal na proteksyon ng mga PPE at makapasok sa katawan. Dahil dito, kinakailangan ang mga bakuna. Inihahanda ng mga bakuna para sa COVID-19 ang ating immune system na labanan ang virus, at talagang napapaliit ng mga ito ang posibilidad nating magkasakit. Nagsasagawa na ng pananaliksik para mapag-aralan kung gaano kabisa ang mga bakuna para sa COVID-19 sa pagpigil sa paglaganap ng virus. Iyon ang dahilan kung bakit kailangan pa rin nating magsuot ng mga mask sa matataong lugar.

Dalawang magkaibang uri ng proteksyon ang mga mask at bakuna. Maihahalintulad ang mga ito sa paglalagay ng sistemang panseguridad sa labas ng bahay, habang mayroon ding mga vault sa loob para maprotektahan ang mahahalagang gamit natin. Mahalaga ang mga ito para mapangalagaan natin ang ating katawan. Sa pamamagitan ng pagpapabakuna, paggamit ng mga mask, at pagdistansya sa kapwa kapag nasa pampublikong lugar, lubha nating napapaliit ang posibilidad na kumalat at makaimpeksyon ang virus, na pumipigil sa malawakang pagkakahawahan.

Sa pagdami ng mga taong nagkakaroon ng proteksyon laban sa virus, maaaring maubusan ang virus ng paraan ng pagkalat, at maaaring magwakas na ang pandemya.

Noong simula ng pandemya, hiniling sa publiko na magsuot ng mga mask at takip sa mukha para maprotektahan ang kanilang sarili at ang iba mula sa paglaganap ng COVID-19. Sa pagdami ng mga taong nababakunahan, lumabas ang mga tanong kung alin sa mga mask o bakuna ang mas epektibo sa pagbibigay ng proteksyon para sa atin. Ang totoo, lubhang magkaibang paraan ng pagpapanatili sa ating kaligtasan ang mga ito. Magkaiba ang mga papel ng mga ito. Ginagamit ang isa para mapigilan ang pisikal na pagpapasahan ng virus, habang ginagamit naman ang isa pa para ihanda ang katawan na pigilan ang pagkakaroon ng malubhang sakit na dulot ng virus.