Lumalabas na ligtas, at nakakagawa ng malakas na immune response, ang paghahalo sa ilang bakuna para sa COVID-19. Gayunpaman, maaaring hindi ganito ang sitwasyon para sa lahat ng bakunang inaprubahan ng World Health Organization (WHO).

Ayon sa mga kamakailang pag-aaral mula sa ilang bansa, nakakagawa ng malakas na immune response ang pagbibigay ng bakunang AstraZeneca para sa unang dosis at bakunang Pfizer para sa ikalawang dosis. Gayunpaman, puwede ring magsanhi ang kombinasyong ito ng mas maraming panandaliang side effect pagkatapos ng ikalawang dosis.

Gumagana ang karamihan ng bakuna para sa COVID-19 sa pamamagitan ng pagpuntirya sa parehong nakaumbok na protina, na nangangahulugang posibleng gumana sa biyolohikal na pananaw ang pagbabago-bago ng ginagamit na bakuna. Ayon sa WHO, wala pang sapat na datos para matukoy kung puwedeng gamitin ang ilang bakuna kapalit ng iba, na dahilan ng pagdami ng pananaliksik para masagot ang naturang tanong.

Sa United States, nagsasagawa ng mga klinikal na pagsubok para malaman kung magagamit ang pinaghalong mga bakuna bilang booster shot para sa matatandang ganap nang bakunado. Nagpayo ang France at Germany nang pabor sa pamamaraang naghahalo ng mga bakuna sa ilang sitwasyon, dahil hindi na inirerekomenda ng mga naturang pamahalaan ang bakunang AstraZeneca para sa ilang partikular na pangkat ng edad. Pinahintulutan din ng Canada, Finland, France, Norway, Sweden, Spain, at South Korea ang paggamit ng iba’t ibang bakuna para sa ikalawang dosis kung AstraZeneca ang unang dosis na ibinigay.

Ayon sa pag-aaral na Combivacs sa Spain, nagkaroon ng mas malakas na pagresponde ang mga taong nakatanggap ng bakunang AstraZeneca para sa unang dosis at bakunang Pfizer para sa ikalawang dosis kumpara sa mga pasyenteng nakatanggap ng dalawang dosis ng AstraZeneca. Samantala, sa isang pag-aaral na tinatawag na Pagsubok sa Com-Cov na isinagawa ng Oxford Vaccine Group, nakitang nakaranas ang mga taong nakatanggap ng magkahalong uri ng bakuna ng mas matitinding side effect. Hindi pa natukoy sa naturang pag-aaral ang epekto sa immune system ng paghahalo ng mga bakuna.

Nagsagawa kamakailan ang mga mananaliksik mula sa National Institutes for Food and Drug Control sa China ng pagsubok sa apat na magkakaibang uri ng bakuna para sa COVID-19 sa mga daga. Natuklasan na nagkaroon ng mas malakas na immune response ang mga dagang nakatanggap ng bakunang may adenovirus para sa unang dosis na sinundan ng ibang uri ng bakuna para sa ikalawang dosis. Hindi nakuha ang mga resultang ito noong ibinigay ang mga naturang uri ng mga bakuna nang baligtad ang pagkakasunod-sunod.

Kasalukuyang pinag-aaralan ng AstraZeneca kung maaaring mapalakas ang immune response kapag nagbigay ng bakuna nito para sa unang dosis at bakunang Sputnik V para sa ikalawang dosis. Inanunsyo kamakailan ng mga manufacturer ng bakunang Sinovac at Sinopharm na pinag-iisipan nilang magsagawa ng pananaliksik tungkol sa pagsasama ng mga bakunang ito sa mga dosis mula sa ibang kompanya.

Sa pamamagitan ng paghahalo ng mga nasubukan at naaprubahan nang bakuna, maaaring mapagaan ang dagok sa supply chain, mapalakas ang pagresponde ng immune system, mapalawak ang saklaw ng resistensya sa komunidad (herd immunity), mabawasan ang paglitaw ng mga bagong variant, at makagawa ng mas malakas at mas tumatagal na proteksyon. Muli, depende ito sa partikular na kombinasyon, at maaaring makasama sa kalusugan o mabawasan ang bisa kapag naghalo ng mga hindi aprubadong bakuna.

Ginawa na dati ang paghahalo ng mga bakuna mula sa iba’t ibang manufacturer para sa trangkaso, hepatitis A, at iba pang karamdaman, pero nagsimula ito sa pananaliksik para sa HIV. Minsan, dapat gawin ang pamamaraang ito dahil sa mga limitadong supply, pagkaantala sa paggawa, pangangailangang imbestigahan ang kamakailang datos tungkol sa mga side effect, at iba pang dahilan. Isang halimbawa ang bakuna para sa Ebola ng Johnson & Johnson na gumagamit ng pamamaraang may pinaghalong dosis sa pamamagitan ng pagbibigay ng bakunang may adenovirus sa unang dosis at bakunang may poxvirus vector sa ikalawang dosis.

Inirekomenda kamakailan ng Canada ang pagtuturok ng bakunang AstraZeneca para sa unang dosis at pagtuturok ng bakunang Pfizer o Moderna para sa ikalawang dosis sa ilang partikular na sitwasyon. Ayon sa patnubay, dapat bigyan ang mga taong nakatanggap ng bakunang may mRNA sa unang dosis (Pfizer o Moderna) ng katulad na bakuna para sa ikalawang dosis. Dugtong ng naturang patnubay, kung wala ang unang bakunang ibinigay, dapat gamitin ang iba pang bakunang may mRNA.

Inilabas ang patnubay na ito pagkatapos isaalang-alang ng ahensya ng kalusugan ng publiko ng Canada ang maliit na posibilidad ng pagkakaroon ng matitinding pamumuo ng dugo at mabababang bilang ng platelet sa pagbabakuna ng AstraZeneca, at ang bagong datos tungkol sa nagagawang immune response kapag sinundan ang bakunang AstraZeneca ng dosis ng bakunang Pfizer.

Batay ang desisyon sa mga kamakailang pag-aaral mula sa United Kingdom, Germany, at Spain. Ayon sa ebidensya, may malakas na profile sa kaligtasan ang pagbabakuna ng AstraZeneca na sinundan ng dosis ng bakunang Pfizer sa kabila ng posibilidad ng pagkakaroon ng mas maraming agarang side effect. Ayon sa datos, sa pamamagitan ng pamamaraang ito, maaaring mapalakas ang immune response ng mga nababakunahan.

Sinuri ng ilang bansa at kompanya ang potensyal ng paghahalo ng mga bakuna pagkatapos lumabas ang mga ulat na nag-uugnay sa bakunang AstraZeneca sa napakaliit na posibilidad ng pagkakaroon ng pamumuo ng dugo.

May mahigit sampung bakuna para sa COVID-19 na ginagamit ngayon sa buong mundo at nakapagbigay na ng 1.2 milyong dosis, pero hindi lahat ay naaprubahan ng WHO at maaaring hindi ligtas paghaluin ang mga ito maliban na lang kung nagbigay ng patnubay ang mga pambansang ahensya ng kalusugan tungkol sa mga partikular na kombinasyon.